Blogg

24.5.2009 | 22:06

Ameríka.

"Ég þarf að fara til Ameríku " sagði ég við sambýliskonuna. Þetta var í byrjun apríl,leiðindaveður og ég kominn með nóg af skerinu. Þurfti ekki að fara en langaði burt úr volæðinu hér. Átti ekki einu sinni fyrir farinu en samt stæll á manni. "Viltu fara í Victorias Secret og kaupa fyrir mig krem?" Hún spurði ekki hvað ég ætlaði að gera í Ameríku, enda ekki forvitin um mínar ferðir. "Hvenær ferðu?" spurði hún. "Fljótlega " svaraði ég og hélt að málið væri búið. Hún fór inn í herbergi og kom til baka með nokkra seðla:"Hérna hefurðu fyrir kreminu". "Fimmhundruð dollarar,þetta er allt of mikið" sagði ég. "Þú kaupir þér eitthvað fyrir afganginn" sagði hún og málið var ekki rætt meira.
   Svo var það í byrjun maí, að hún spurði um Ameríkuferðina. Ég var búinn að gleyma þessu gamni en hélt samt áfram: "Það breyttist aðeins og ég fer síðar" sagði ég og hélt ég væri sloppinn. "Sýndu mér Victorias síðuna á netinu, ég ætla að biðja þig um að kaupa nærföt fyrir mig þar þegar þú ferð". Eftir að hafa kíkt aðeins á gellur á nærfötum og fundið út hvað hún vildi, fór hún og náði í nokkra seðla. "Þú varst búin að láta mig fá pening,það dugar alveg" sagði ég. En hún hlustaði ekki á mig þannig að nú er ég með þúsund dollara í skúffunni,tilbúna.
   Undanfarið hefur hún verið að vinna mikið, helgarvinna og helgidagavinna svo til alla daga síðan í vetur. Þannig að ekki er hún alveg auralaus eftir þvílíka törn.
   Ég held ég fari að minnast aftur á þessa Ameríkuferð. Það er ýmislegt hægt að gera þar fyrir fimmtánhundruð dollara.

Flokkur: Bloggar | Facebook