Aðgát skal höfð....

Ekki í fyrsta sinn. Það hefur komið fyrir að mér hafi verið úthýst úr athugasemdadálkum bloggs. Og þá líklega vegna þess að ég hef ekki verið sammála þeim er bloggið ritar. Það gerðist fyrst hjá vinstri grænu ritræpunni sem að ég nenni ekki lengur að lesa,svo væmin sem skemmt remúlaði og bloggið leiðinlegra en ræður Brésnevs,sem að ég bar út þegar ég vann fyrir APN.Ég las þær reyndar sjaldan. Og enn er mér hent út úr athugasemdum.
   Ég ákvað þegar ég byrjaði að skrifa hér að gera það undir nafni,því mér leiðist þegar fólk skrifar nafnlaust. Ég var að skrifa í dálk hjá Eyjagoðinu Agli,sem að er í vinnu við að blogga. Og þar sem að ég féll ekki á kné og var sammála heldur var með pillu um,að ekki væri hann stóridómur en hitti þó stundum á réttu spurningarnar. Einnig spurði ég hvernig hann nennti að hafa opið fyrir nafnlausar athugasemdir,var mér með það sama hent út. Það er í lagi mín vegna, en skemmtilegra væri að fá svar.
   Ég man ekki hvort það var á Vogi eða Sogni, sem hann svaraði mér alltaf er ég innti einhvers.

Afmæli.

Ég skrapp niður á fæðingardeild fyrir tuttugu og fimm árum,þar sem móðir barnanna minna hafði legið í vellystingum í fjórar vikur. Ég man ekki alveg klukkan hvað það var en eftir rúmlega sólarhrings læti í konunni (það kallast víst hríðir) fæddist okkur dóttir. Var ég viðstaddur þessa athöfn þar sem voru notuð allskonar verkfæri eins og tangir,felgujárn og loks sogklukka sem að náði þessu að lokum. Leist mér ekki neitt sérstaklega á frumburðinn í glerkassa svona til að byrja með. En í dag er ég afskaplega stoltur af henni.
   Til hamingju með daginn Helga Dögg.

Sparnaður.

Það eru aðrir en ég hér á blogginu sem hafa allskonar ráð handa ríkisstjórninni,ráð sem að ekki eru notuð. Skrýtið.Ég,sem hélt að bloggarar væru svo gáfað fólk, að landsráðendur myndu fara eftir þeim í einu og öllu,eða því sem næst.
   Og þar sem ég er ekki einn af þessum gáfuðu,ætla ég engu að bæta þar um. Ég er aftur á móti með smá ráð um sparnað. Ein bensínsalan auglýsir tveggja krónu afslátt á bensínlítra. Ef að maður á bíl sem að eyðir 10 lítrum á hundraðið og fer tuttugu hringi í kringum Ísland á svo ódýru bensíni, þá sparar maður fimm þúsund kall. Það munar um minna.

Hrægammar.

Var að horfa á fréttirnar á Stöð 2 og var ekki skemmt. Hef oft hugsað um það áður þegar ég sé fréttamenn láta eins og freka krakka á öskudaginn í nammileit, eru þeir að þessu áreiti við menn fyrir áhorfendur eða sjálfan sig?Þegar menn í eldlínunni eru eltir af hrægömmunum, þá fá allir sama svarið,hver sem spyr. Og held ég að áhorfendum sé nákvæmlega sama um hver það var sem spurði. En kjánagangurinn í fréttamönnunum og flaðrið minnti á ágengar rollur i fjárhúsinu þá er ég gegndi er ég var yngri.

Bláedrú.

Það er auglýstur hátíðar - og baráttufundur SÁÁ í blaði í dag. Ég væri alveg til í að fara því alltaf er gaman að hlusta á Þórarinn Tyrfingsson en þegar ég sá að Jón Gnarr yrði fundarstjóri og Kristján Jóh., Bubbi, Páll Óskar og fleiri sem að ég þekki ekki yrðu til "skemmtunar" þá hætti ég við. Hérna áður fyrr þurfti nefnilega minni leiðindi en þetta sem tilefni til að detta í það. Og ég hef ekki ráð á því að detta í það núna.Verð bara heima og horfi á "How to look good naked" og annað álíka gæðaefni.

Englar?

Þetta skil ég ekki. Getur verið að hinir vammlausu bloggarar sem hátt létu um "árás" eftir að húsleit fór fram hafi haft rangt fyrir sér. Ég las svo mikið um lögregluofbeldi og að þarna hefðu bara verið algóðir englar allslausir. Kannski að einhverjir af þessum ekkihælisleitendum fái nú inni hjá einhverjum góðhjörtuðum bloggara þar til að úr rætist. Eða felst góðmennskan þar bara í jákóramjálmi gegn yfirvaldi sem að er í vinnunni?
   Skyldu hinir alvísu og vammlausu éta upp sitt hneykslunargubb?

Drógu umsóknir til baka eftir húsleit

Greyið.

Ekki veit ég hvenær bloggið byrjaði en fullt af fólki tjáir sig hér,sem hefði ekki að öðrum kosti skrifað orð á blað. Þegar svo margir fara af stað þá má búast við allskonar ambögum, sem að einn étur upp eftir öðrum. Það er eitt orð sem að hefur upp á síðkastið verið vinsælt á kerlingabloggunum og apar það hver eftir annarri. Þetta er orðið "húsband", sem að einn bloggari notar öðrum fremur,oft,enda með ritræpu. Þetta er orðskrípi og bloggarinn virðist vera víðförull í mannheimum og hefur átt fleiri en eitt "húsband". Núverandi "húsband" á örugglega bágt. Greyið.

Óþolandi yfirgangur.

Hvernig stendur á því að Lögreglustjórafélagið sendir frá sér svona ályktun? Var búið að tala við "alvitra" bloggara og dómstól götunnar? Eða er þetta bara gert si svona, þvert á það sem pupullinn vill? Mér finnst að hundrað "málefnalegir" nafnleysingjar á blogginu og ofurbloggarar með sína jákóra ættu að hafa eitthvað um svona ályktanir að segja. En ekki virðist það vera hægt,heldur er vaðið yfir fólk og hugsað sjálfstætt. 
   Svona lagað gengur ekki.

Styðja dómsmálaráðherra

Nöldrari.

Jæja,þá er maður búinn að prófa lambahrygg með grænum aspas,maís og sterkri karrísósu. Þetta var  ekki alveg eins og hjá mömmu en karrísósa með hrygg er sérstakt.
   En að öðru. Stöð tvö er alltaf með "besta efnið" og áðan var talað um að taka forskot á sæluna,þ.e. að sjá smá brot úr þættinum "Logi í beinni". Sérhver er nú sælan,að fá enn einn viðtalsþáttinn með tveimur eða þremur viðmælendum, sem eru búnir að tröllríða fjölmiðlum hér með mislöngum hléum og svo misgóðar hljómsveitir til að syngja eitt lag.Illa klæddir hljómsveitameðlimir eru ekki og hafa ekki verið augnayndi til að sýna í sjónvarpi,í besta falli er hægt að hlusta á þá í útvarpi.Ekki er heldur skárra að hlusta á misgáfulegar spurningar til þeirra sem að nenna að mæta og allir eru svo "skemmtilegir". Má ég frábiðja mér slíka sælu.
  Rosalega getur maður nöldrað.
  

Alvöru.

Auðvitað hefur Palin átt við alvöru erlendan þjóðhöfðingja.

Palin minnt á fund með Ólafi Ragnari